ES 2012 istehlak elektronikası sərgisinin rəsmi açılışı sabaha nəzərdə tutulsa da, artıq bu gündən şirkətlərin çoxu öz stendlərini təqdim edərək yeni məhsullarını nümayiş etdirirlər.
Belə ki, Toshiba şirkəti sərgiyə özünün dünyanın ən nazik planşeti adlandırdığı Excite X10 (Regza AT700) qurğusunu gətirib. Modelin qalınlığı 7,6 mm, çəkisi 550 qram təşkil edir. Aparat maqnezium ərintili korpusda işlənilib, displey isə Gorilla Glass şüşəsi ilə qorunur.
Toshiba Excite X10 planşeti 1280х800 təsvir ölçülü 10,1 düymlü ekran, 1,2 giqahers takt tezlikli ikinüvəli TI OMAP 4420 prosessor, 1 giqabayt operativ yaddaş və iki kamera - 5 meqapikselli əsas və 2 meqapikselli ön kamera ilə təchiz edilib.
Planşet microUSB, miniHDMI portlarına və microSD slotuna malikdir.
Qurğunun ABŞ-da satışlarına cari ilin birinci rübündə başlanılacaq. 16 giqabaytlıq versiyanın qiyməti 530 dollar təşkil edəcək. Əvvəlcə aparat Android 3.2 mobil əməliyyat sistemi ilə işləyəcək, lakin sonradan Toshiba onu Android Ice Cream Sandwich (4.0) ƏS-dək yeniləcəyinə söz verir, Onliner yazır.
Bundan başqa, şirkət hələ işıq üzü görməyən Windows 8 ƏS-in idarəetməsi ilə işləyən “ultrabuk”un prototipini nümayiş etdirib.
Model 1,3 giqahers takt tezlikli Intel Core i3 prosessor, 14 düymlü displey, 4 giqabayt operativ yaddaş, 128 giqabayt həcmli SSD-toplayıcı ilə təchiz edilib.
Yaponiya şirkəti qurğunun qiyməti və bazara nə vaxt çıxarılacağı barədə hələ ki məlumat vermir. Lakin bunun Windows 8-in çıxacağı payızdan tez baş verməyəcəyi gözlənilir.
mənbə: ans-press